గబగబా నడవరో కోయదాదా

గబగబా నడవరో కోయదాదా హై

నువ్వు పోరుజేయ నడవరో కోయదాదా హై..  “గబగబా”

పొద్దుమాపు కష్టపడి పోడేమో నరుకుతావు

రాల్లన్నీ ఏరుతావు నేల చదను చేస్తావు

పోడుభూమి కొరకు నీవు పట్టాలు అడిగితేను

పోలీసులు పట్టుకెల్లి పొట్టుపొట్టు గొడుతుండ్రు.. “గబగబా”

కాల్లల్లో ముల్లు దిగిన వల్లంతా గీరుకున్న

వెదురుకూపుల కెల్లి వెదురుబొంగు నరుకుతావు

లారి లోడ్ కెక్కించి కంట్రాక్టరు కప్పచెబితే

కంట్రాక్టరు గాడేమె కూలి ఎగదొబ్బుతుండు.. “గబగబా”

యిప్పపువ్వు యిప్పగింజ కుంకుళ్ళు పళ్ళు తేనె

చింతపండు దులుపుకొని తవిసబంక తీసుకొని

అడివిలోని సంపదంత మైళ్ళు మైళ్ళు మోసుకొచ్చి

కార్పరేషను కిస్తేను రోజుకూలి రాదాయె.. “గబగబా”

కట్టెపుల్లలేరుకొస్తే కోడిపిల్లలెత్తుకెల్లె

మేకపుల్లరి దొబ్బి మనుబోతులాగ బలిసె

సారెదారు చౌకిదారు సత్తువంత గుంజుతుండ్రు

రేంజరు గాడేమొ మన రక్తాన్ని తాగుతుండు.. “గబగబా”

కాంట్రాక్టు జేసెటోడు నాటలేదు ఈ అడవి

ఫారెస్టు రేంజరోడు పెంచలేదు ఈ అడవి

అడవిలోని సొత్తంతా ఎవడబ్బా ముల్లెగాదు

అడివిలోన పెరిగినోడ అడివి పైన హక్కు నీది.. “గబగబా”

రోజుకూలి లేనోడ రేచులాగ లేవరన్న

పూటకింత లేనోడ పులిలాగ లేవరన్న

సచ్చుకుంట బతికెటోడ సింహమోలె లేవరన్న

అడవితల్లి బిడ్డడా అగ్గిలాగ మండరన్న.. “గబగబా” 20/5/1983