ఏమి చేద్దాం ఏమి చేద్దాము

ఏమి చేద్దాం ఏమి చేద్దాము

జనులార మనము

ఏమి చేద్దాం ఏమి చేద్దాము..

గంగిగోవు పాలుదెచ్చి లింగపూజలు చేద్దమంటె

గుడిని లింగాన్ని మింగె లంగగాళ్ళు బయల్దేరిరి – ఏమి

గంగిగోవు పాలు మింగె లింగపూజలు వద్దురన్న

తనను మింగె దొంగలాను తరమలేని లింగడెందుకు

పోరు చేద్దాం పోరు చేద్దాము

జనులార మనము

పోరు చేద్దాం పోరు చేద్దాము..

ఏడు ఏడు కొండలెక్కి ఎంకటేసుకు మొక్కితేను

దుడ్డులిచ్చి లడ్డుకొంటె సీకులొచ్చొ మేకులొచ్చె – ఏమి

కలియుగ వైకుంఠమైనా కల్తీలేని చోటు కాదు

దేవుడె ఒక కల్తి సరుకు భక్తి దానికి పెద్ద సోకు – పోరు

నల్ల బట్టలు వేసుకుంటడు ఆలినేమె వల్లనంటడు

స్వామియే అయ్యప్ప అంటూ శబరిమలకు సాగిపోతడు

ఈతిబాధలు పక్కనెట్టి రోతబాటను నడుస్తున్నడు

బాధలన్ని తీరుదారి పోరుబాట నడుద్దాము

తోక వెనుక ఉన్నవాడు కోకలెత్తుకు ఎల్లినోడు

ఆలినడివికి పంపినోడు అందరూ దేవుళ్ళె మనకు

ఎందరూ దేవుళ్లు ఉన్నా మందికి ఒరిగేది సున్న

దేవుడైనా రావుడైనా దండిగ ఉన్నోడికేరా

పొందులేక పుట్టినోడు ప్రభువు ఏసు చర్చికెళితె

కోతల పండుగ అంటూ కోళ్లు గొర్రెలు మింగినారు

శిలువ ఎక్కి ఏసుక్రీస్తు నిండుప్రాణం బలిని చేస్తే

ఏసుపేరుతో ప్రీస్టుస్వాములు మందిసొమ్ము మింగుతుండ్రు

అల్లహో అక్బరు అంటడు అయిదు సార్లు నమాజ్ చేస్తడు

తలాక్ తలాక్ తలాకంటడు మళ్ళి పెళ్ళికి తయారవుతడు

ఆడదాన్ని అబల చేసి అణిచివేయ చూసె మతము

మతాలన్నిటి ధర్మమొకటె కులాలన్నిటి గోత్రమొకటె

డార్విను థీరి చెప్పి దేవునికి మొక్కుతాడు

సైన్సు చదివిన బుద్ధిహీనుడు సాయిబాబ కాళ్లు పడతడు

గుడ్డి చదువుకు గుణం మారునా సైన్సు చదివిన సెన్సు వచ్చునా

బట్టిపట్టే రొట్టచదువులు తీరు మార్చ పోరు చెయ్యి

అందమైన నగరమాని అయిదరబాదు చూడబోతె

ముక్కు మొకము తెల్వనోడు ఒక్కపోటు పొడిచిపాయె

దోపిడికి అడ్డుతెరగ మతం మంటలు రేపుతుండ్రు

హిందుముస్లిం భాయిభాయని దోపిడిపై దాడి చేయరా

భారతీయ సంస్కృతాని గొంతుచించే వంతగాళ్లు

భారతమ్మను అమ్ముకునే బట్టెబాజిల చెంతచేరిరి

పాత గోరిల్ తవ్వితేను ఎండుబొక్కలు దొరుకునన్న

కొత్తసంస్కృతి కొరకు నువ్వు కత్తివోలె మెరవరన్న            8/3/1983