మాయదారి చచ్చినోళ్లు
మాయ రోగమొచ్చినోళ్లు
పిచ్చి పట్టి తిరుగుతుండ్రు సాంబో నేనెట్టా
నేనెట్టా బతికేది బాబు సాంబో నేనెట్టా.
ఫుల్లుగున్న బస్సులోన
పిల్లిలాగ దూరిదూరి
ఏడేడో తాకుతుండు సాంబో నేనెట్టా
నేనెట్టా మసిలేది బాబు సాంబో నేనెట్టా
హవుసు ఫుల్లు హలులోన
సైడు సీటు దొరకబట్టి
బరుకు బరుకు గొకుతాడు సాంబో నేనెట్టా
నేనెట్టా చూసేది బాబు సాంబో నేనెట్టా.
గల్లి చివర మోరి కాడ
గుట్క నోట్లో ఏసుకొని
తుపుకు తుపుకు ఉమ్ముతుండు సాంబో నేనెట్టా
నేనెట్టా ఎల్లేది బాబు సాంబో నేనెట్టా.
ఏలెడంత పోరగాడు
స్టైల్గా సిగరెట్టు తీసి
గుప్పు గుప్పు ఊదుతుండు సాంబో నేనెట్టా
నేనెట్టా ఏగేది బాబు సాంబో నేనెట్టా.
ఎంసెట్లో సీటు వచ్చి
బీటెక్లో చేరబోతే
రింగురింగు రాగింగు సాంబో నేనెట్టా
నేనెట్టా చదివేది బాబు సాంబో నేనెట్టా.
రంగురంగు సిస్టంలో
ఫీడింగు చేస్త వుంటే
తొంగి తొంగి చూస్తడేంది సాంబో నేనెట్టా
నేనెట్టా చేసేది బాబు సాంబో నేనెట్టా.
బాత్రూము పబ్లికాయె
బెడ్రూము పబ్లికాయె
బొక్కబొక్కలో కెమెరా సాంబో నేనెట్టా
నేనెట్టా చచ్చేది బాబు సాంబో నేనెట్టా.
వంటి నిండ చీర ఉన్న
సగం ఫాన్సి డ్రస్సు అయిన
చూపులే సూదూలు ఆయే సాంబో నేనెట్టా
నేనెట్టా వుండేది బాబు సాంబో నేనెట్టా.
బూతు జోకు లేత్తవుండ్రు
రోత మాట లాడుతుండ్రు
నరం లేని నాలికోళ్లు సాంబో నేనెట్టా
నేనెట్టా పలికేది బాబు సాంబో నేనెట్టా
స్కూటి మీద ఎల్తు ఉంటే
ఓవర్ టేకు సడన్ బ్రేకు
సీటి గొట్టి సంపుతుండ్రు సాంబో నేనెట్టా
నేనెట్టా నడిపేది బాబు సాంబో నేనెట్టా.
No comments:
Post a Comment